الفتاه القبطية نورا ضحية جديدة للاستهتار الطبى وشقيقتها تستغيث
الفتاه القبطية نورا ضحية جديدة للاستهتار الطبى وشقيقتها تستغيث
روت شقيقة الفتاة نورا التى تبلغ من العمر ٢٥ سنة وام لطفلين سنتين وتلات سنين وقالت ان شقيقتها كانت حامل للمرة الثالثة ونظراً للظروف قررت ان تجهض نفسها وهى حامل فى اول اسبوع وبالفعل ذهبت للاجهاض وبعد 40 يوم من الإجهاض جالها نزيف.
واكملت قائلة ذهبنا بها الى القصر العيني الفرنساوي الجديد التعليمي قالوا إنها محتاجة عملية كحت وتنضيف للرحم وفي حالة أن الرحم موقفش النزيف هيشيلوا الرحم وقام زوجها بالامضاء على هذا الاقرار ونبهوا الدكتور انها عندها حساسية وصدرها متستحملش بنج كلي.
وبرغم ذلك اعطاها بنج كلها بعد ان دخلت العمليات والعملية مفروض أنها متاخدش 10 دقايق قعدت فيها ساعتين ونص وبعد العملية طلعت عالعناية المركزة بسبب ان جالها هبوط مفاجئ والقلب وقف لانها اخدت بنج كلي وبكمية كبيرة وهما منبهين.
بعدها بيوم لقيناهم جايين جهاز الايكو بتاع القلب وبيعملها رسم عشان جالها قصور حاد في الشريان التاجي وضعف عضلة القلب بقيت بكفاءة 34 وهي المفروض فوق ال80 فجأة واحدة لازم تعمل عملية قسطرة بكام القسطرة ب8 الاف ودعامة ب25 الف ماما صوتت احنا داخلين ع عملية ب3 لا لاف جنية.
طبعا فلوسنا خلصت قالوا انتوا ملكوش مكان في المستشفى وعملنا التحويل 7 ساعات واختي عالاجهزة بتموت ولازم تتحول وتعمل العملية في اقصي وقت وبعد خناقات مع الحسابات وفي الاخر مضوا ماما ع شيك ب8الاف جنية عشان يخرجوها جبت إسعاف من برة.
المسعف اول ماشافها قالهم حالتها صعبة عاوز دكتور يطلع معايا ساعة مرضتش دكتورة العناية تطلع معاهم وبعد خناقة كبيرة معاهم ومع مدير المستشفى وجبنا ظابط من تحت طلعوا معانا دكتور وقالتلنا الدوا الي مكنش موجود المشكلة أن لازم 200 جنية بابا قالها يعني تموتوا البت عشان 200 جنية.
المهم طلعنا بيها عالقصر العيني القديم بعد ان اصبحت اختى حالتها كالاتي: ضعف شديد في عضلة القلب قصور حاد في الشريان التاجي ارتشاح جامد عالرئة التهابات في صدرها تسمم كامل في الدم انا اختي داخلة المستشفى ع رجلها وبتضحك وتهزر معانا طلعت ع نقالة.
واختتمت قائلة: اطالب المسؤولين بمعاقبة إهمال الدكاترة اللى واخدين الشهادة بالفلوس حسبي الله ونعم الوكيل فيهم ورحنا المستشفى مش راضيين يدونا اسماء الدكاترة الي عملت العملية ولا تقرير بحالتها قبل ماتدخل العمليات وبيقولوا أنها داخلة لهم ميتة كفاية إهمال بقي أرواح الناس مش لعبة انا عاوزة حق اختي وحق الي زيها من فضلكم لازم الموضوع يبقي راي عام.