نياحة شماس من خدمة الانبا نوفر السائح
نياحة شماس من خدمة الانبا نوفر السائح
نقلا عن الشماس الاكليريكي بيتر بشارة امين خدمتنا ومؤسسها
سئلوني كتير منكم هو مين ملاك اللي اتنيح و اتعودت احكي لكم عن القديسين اللي خدمت معاهم سنين من عمري فجه الوقت اللي احكي لكم عن ملاك منير اللي اسمه ملاك وهو منير بجد
ملاك خدم معايا من ١٢ سنة تقريبا كان شاب جميل وطيب جدا ( بيعرف يصلي ويسبح وشاطر في الالحان وشاطر في الخدمة جدا )
اكتر خادم لم ينقطع عن خدمته لكبار السن طول حياته
كان عنده مرض نادر جدا هو ان اطرافه بتطول وبتنمو عن غير طبيعي بتاعنا فكانت ايده صوابعها اطول حبتين ولكن كان واد زي القمر مفيش صورة مفهاش ضحكته الجميلة المميزة واخد بركة اكليل المرض لانه كان بيعاني باتعاب في قلبه
جالي يخدم معايا هو واخوه مرقس وكنت ملاحظ محبته للخدمة الفياضة لدرجة انه كان بيخدم كل يوم
اقصي مرة اتعصب فيها شفته وهو بيكشر حبة ويسكت وميتكلمش
قلبه قلب ملاك
والمذبح كان اهم شئ عنده
ملاك كان ممكن ميكنش ليه كلام كتير بس يبعت رسالة صغيرة تحس انه لمسك
دراسة الكتاب منه مملوءة بالنعمة
ضيف صغير علي قلوبنا ومكنش تقيل ولما يقعد يشكر ربنا ويصلي من قلبه
ممكن ولا واحد من اللي هنا( حدمة العدرا وابونوفر الجديدة) خدم معاه بس كان ملاك حقيقي ملاك
اتعلمنا منه في اقصي المشاكل يصلي
مرة حصل مني موقف وحش قوووووي تجاهه وحسيت ان هو اضايق رحت كلمته قلته سامحني ياملاك قالي انت سامحني اوعي تزعل مني انت اخويا الكبير اللي بيعلمني وانا لا يمكن ازعل منه
حسيت وقتها اني عايز اقوله ياابني انا لو مكانك كنت خربت الدنيا
بس حقيقي فعله من ثمر قلبه
لما تقرب منه لو متعرفهوش يتعرف عليك ويصلي لاجلك بجد ويخدمك
كان بيعرف يتكلم مع الكل وعلشان المخدومين عنده استعداد مينمش ويسهر
مفتكرش انه زعل حد منه ابدا
بلعكس يخدم الكل
الكل حزن بفراقه بس الكل حس انه اتحرر وراح الملكوت
كان انسان مختلف في كل شئ حتي طيبته مختلفة
حتي محبته مختلفة
صلاته مميزة من القلب نتاج عشرة مع يسوع
صلواته تكون معنا ولربنا المجد الدائم
اكسيوس ملاك بي ابصالتوس